Deputetët e Kuvedit të Serbisë debatuan për orë të tëra të hënën mbi mocionin e mosbesimit ndaj Qeverisë së Serbisë. Kryetari i grupit parlamentar të Lëvizjes Popullore të Serbisë (NPS), Mirosllav Alleksiç, tha se mocioni i mosbesimit ndaj Qeverisë është nxitur kryesisht nga çështja e njohur si “Shtabi i përgjithshëm” dhe roli i ministrit serb të Kulturës, Nikolla Sellakoviq, në këtë rast. Mocioni u dorëzua nga 62 deputetë të opozitës në muajin shkurt, pasi Prokuroria për Krimin e Organizuar nisi hetime ndaj Sellakovic dhe tre zyrtarëve të tjerë. Sipas Prokurorisë, ata dyshohen se kanë falsifikuar dokumente për t’ia hequr statusin e monumentit të mbrojtur kompleksit të ish-Shtabit të Përgjithshëm të Ushtrisë Jugosllave, i cili u dëmtua gjatë bombardimeve të NATO-s në vitin 1999. Heqja e këtij statusi hapi rrugën për ndërtimin e një kompleksi, ku do të investonte Jared Kushner, investim nga ku hoqi dorë. Nëse Kuvendi miraton mocionin e mosbesimit, atëherë do të nisë afati 30-ditor për formimin e një qeverie të re. Nëse kjo nuk ndodh, Kuvendi do të shpërndahet dhe do të shpallen zgjedhjet e reja parlamentare. Presidenti i Serbisë, Aleksandar Vuçiç ka paralajmëruar më herët se zgjedhjet parlamentare do të mbahen në tetor ose nëntor, ndërsa ato presidenciale disa muaj më vonë.