Bashkimi Evropian i ka bërë thirrje Kosovës që të vijojë pa vonesa të mëtejshme procesin e konstituimit të institucioneve, duke kërkuar respektimin e Kushtetutës, vendimeve të Gjykatës Kushtetuese dhe sundimit të ligjit. Në një përgjigje për mediat në Kosovë, një zëdhënës i BE-së ka theksuar se formimi i institucioneve do t’i mundësonte Kosovës të përfitonte plotësisht nga mundësitë që ofron rruga drejt integrimit evropian, përfshirë edhe Planin e Rritjes për Ballkanin Perëndimor. BE-ja ka nënvizuar gjithashtu nevojën për dialog efikas dhe konstruktiv mes partive politike, duke theksuar se bashkëpunimi dhe një qëllim i përbashkët janë të domosdoshëm për avancimin e reformave që kërkojnë qytetarët. “Vetëm një dialog efikas dhe konstruktiv ndërmjet partive, si dhe një qëllim i përbashkët, do t’i mundësojnë Kosovës të ndjekë objektivat e saj dhe të zbatojë reformat”, është shprehur zëdhënësi i BE-së.