Greqia ka propozuar në Bashkimin Evropian krijimin e një mekanizmi të përhershëm që do të lejojë pezullimin e përkohshëm të procedurave të azilit në raste krizash migratore, duke argumentuar se kjo do të ndihmojë në mbrojtjen e kufijve të jashtëm të bllokut dhe në parandalimin e instrumentalizimit të flukseve të emigrantëve. Propozimi u prezantua nga ministri grek i Emigracionit dhe Azilit, Thanos Plevris, gjatë mbledhjes së jashtëzakonshme me videokonferencë të ministrave të Brendshëm dhe të Emigracionit të vendeve anëtare të BE-së, e thirrur pas zhvillimeve të fundit në Ceuta. Sipas Plevris, mekanizmi do të aktivizohej vetëm në rrethana të jashtëzakonshme dhe në përputhje me të drejtën evropiane dhe ndërkombëtare. Ai tha se nisma mbështetet në përvojën e Greqisë gjatë krizës në Evros në vitin 2020 dhe synon të mundësojë pezullimin e përkohshëm të shqyrtimit të kërkesave për azil, si edhe kthimin e menjëhershëm të personave që hyjnë në mënyrë të paligjshme. Ministri grek shprehu solidaritet me Spanjën për situatën në Ceutam por kërkoi gjithashtu forcimin e mbrojtjes së kufijve të jashtëm të BE-së, rritjen e rolit të Frontex-it dhe zgjerimin e bashkëpunimit me vendet e treta për të frenuar flukset migratore. Si shembull të efektivitetit të këtyre masave, Plevris tha se mbërritjet në ishujt e Egjeut kanë rënë me mbi 60% gjatë gjashtëmujorit të parë të vitit 2026.