Një stuhi e fortë dimri që ka përfshirë SHBA-në këtë dimër, mund të sjellë krishtlindjet më të ftohta në katër dekada në disa pjesë të vendit. Një valë të ftohti që shënohet vetëm një herë në një gjeneratë, do të përfshijë veriperëndimin e paqësorit para se të drejtohet më në lindje dhe të shndërrohet në një ciklon-bombë të premten. Më shumë se 90 milionë njerëz ndërkohë janë nën paralajmërime për mot ekstrem në 37 shtete të amerikës. Rreth 80 për qind e vendit pritet të regjistrojë temperatura nën zero, përfshirë shtete jugore, si Teksasi. E emërtuar stuhia dimërore Elliot, nga Ëeather Channel, shpërthimi arktik pritet të sjellë krishtlindjet më të ftohta në SHBA që nga fundi i viteve 1980. Edhe Florida, shteti i rrezeve të diellit, pritet të kalojë krishtlindjet më të ftohta në 30 vite. Shërbimi kombëtar i motit tha se temperatura të acarta prej -45 gradësh celcius mund të shënohen në fund të kësaj jave në disa pjesë të vendit. Guvernatorët në Kentaki dhe Karolinën e veriut ndërkaq kanë shpallur gjendjen e emergjencës. Reshjet e borës dhe ngricat pritet të shkaktojnë edhe kaos në udhëtime në fundjavë. E ndërsa stuhia dimërore forcohet meteorologët paralajmërojnë se ajo do të shndërrohet në një ciklon bombë. Ky është emërtimi që i është dhënë një stuhie që intensifikohet shpejt, me presionin e ajrit që bie me të paktën 24 milibarë në 24 orë. Këto quhen ciklone bombë për shkak të fuqisë shpërthyese të shkaktuar nga rënia e shpejtë e presionit. Stuhi të tilla sjellin kushte ekstreme të motit dhe janë jo shumë të pazakonta në shba dhe kanada.