Të krishterët në të gjithë botën festuan Krishtlindjet të mërkurën, nën hijen e luftrave, me një sulm të frikshëm mëngjesin e Krishtlindjes në Ukrainë nga Rusia dhe një avion pasagjerësh të rrëzuar në Kazakistan. E ndërsa lufta në gaza nuk po tregon shenja përfundimi, Papa Françesku bëri thirrje për paqe në Lindjen e Mesme në shërbesat e tij. Ai e shfrytëzoi meshën e tij të Krishtlindjes në Vatikan për të nxitur të krishterët të mendojnë për "luftërat, për fëmijët e vrarë, për bombat mbi shkolla apo spitale" pas një viti tjetër konfliktesh të furishme. Por ndërsa ai po fliste, Moska lëshoi shumë raketa dhe dronë në një përpjekje për të shkatërruar rrjetin e energjisë të Ukrainës. Ukraina i feston Krishtlindjet më 25 dhjetor që nga viti 2017, pasi më parë i festonte ato si fqinjët e saj ortodoksë, më 7 janar. Në vendlindjen biblike të Jezu krishtit, në qytetin e betlehemit, në bregun e okupuar perëndimor, festimet mes popullatës palestineze ishin të heshtura. Që nga fillimi i luftës në Gaza, Betlehemi e ka hequr pemën e tij gjigante të Krishtlindjes dhe dekorimet që zakonisht tërheqin turma turistësh, duke u kënaqur vetëm me disa drita festive. Patriarku latin, kryepeshkopi Pierbattista Pizzaballa, i tha një turme të vogël të martën se ai sapo ishte kthyer nga Gaza, ku "pa gjithçka të shkatërruar, varfëri, fatkeqësi"."Por unë pashë gjithashtu jetën -- ata nuk dorëzohen. Kështu që as ju nuk duhet të hiqni dorë. Asnjëherë." Rreth 1,100 të krishterë jetojnë në Gaza, me qindra të mbledhur në një kishë atje për t'u lutur për fundin e luftës.