Lufta e Rusisë kundër Ukrainës duket se ka lënë në hije atë që po ndodh me vetë Rusinë. Pikërisht në nëntokën kriminale ruse po ndodhin lëvizje tektonike, thotë për Dojce Velle, Mark Galeotti, historian dhe ekspert i shërbimeve sekrete ruse dhe krimit të organizuar. Shteti rus po mbështetet gjithnjë e më shumë në shërbimet e rrjeteve kriminale, sipas një raporti të publikuar këtë javë nga profesori i Universitetit të Londrës. Sipas tij, krimi i organizuar në Rusi, para pushtimit të Ukrainës, ka qenë i lidhur me bandat në Ukrainë dhe së bashku me to kanë formuar grupet më të mëdha kriminale në Evropë. Por lufta i shkatërroi ato lidhje. Pas fillimit të luftës, disa nga figurat kryesore të krimit rus iu bashkuan ushtrisë private "Ëagner". Lufta ndryshoi të gjithë status quo-në dhe mbi të gjitha balancën e fuqisë midis grupeve të caktuara. Fituesit më të mëdhenj ishin grupet që kishin lidhje me Bjellorusinë, Armeninë dhe Azinë Qendrore, ndërsa humbësit përfshijnë rrjete të mëdha kriminale transnacionale si për shembull, grupet Solntsevskaya dhe Tambovskaya". Këto janë dy strukturat më të famshme mafioze në Rusi. E para vjen nga Moska dhe e dyta nga Shën Petersburgu. Kështu, rrugët alternative të tregtisë dhe kontrabandës tani janë bërë më të rëndësishme. Disa vende në Lindjen e Mesme dhe Qendrore, si dhe Azia dhe Turqia dallohen, thotë Galeotti. Lidhjet midis shtetit rus të Vladimir Putinit dhe botës së krimit në Rusi bazohen në mënyrë cinike në ndihmën e ndërsjellë, shpjegon studiuesi. Për shembull, strukturat kriminale përfshihen gjithnjë e më shumë në prokurimin e mikroçipëve dhe teknologjive të tjera të nevojshme për industrinë ruse të mbrojtjes. Në raportin e tij, Galeotti citon një zyrtar të Europolit: "Nëse dikush ndihmon në kontrabandën e mikroçipave, FSB-ja mund të mbyllë një sy kur bëhet fjalë për trafikun e drogës, trafikimin e qenieve njerëzore etj."