Vetëm pak orë para mbledhjes së kryesisë së Partisë Demokratike, Lulzim Basha është ndalur në Elbasan, ku ka vijuar retorikën shfajësuese ndaj strukturave të kësaj force politike. Shtrirjes së dorës të kryeministrit Rama për një bashkëpunim në katër vitet në vijim, Basha ju kundërpërgjigj me një ftesë për vizitë në Elbasan, ku sipas tij krimi dhe pushteti janë bërë njësh. ’Atyre që pyesin pse nuk jeni të gatshëm të bashkëpunoni me Edi Ramën, ju them ejani në Elbasan. Ejani dhe shikoni se si janë bërë njësh pushteti me krimin, krimi me pushtetin. Siç e ka thënë dikur gjyqtari i famshëm anti-mafia, Paolo Borselino, “krimi dhe politika ushtrojnë kontrollin mbi të njëjtën hapësirë. Ato nuk mund të jenë në paqe me njëra-tjetrën, por vetëm në luftë me njëra-tjetrën ose përndryshe njëra prej tyre ka fituar”. Në një moment ku selia blu po kalon momente aspak të qeta organizative, thirrjeve të Nishanit, Ristanit e Kadillit për largimin e Bashës, ky i fundit ju përgjigj duke i cilësuar kritika konstruktive brenda familjes. Së fundmi, diçka sa i përket zhvillimeve brenda familjes tonë. Duan s’duan kundërshtarët tanë, ne jemi një familje e madhe politike Në këtë shtëpi të madhe nuk ka të tepërt, ndaj çdo mendim, ide, kritikë konstruktive duhet të jetë e mirëpritur. Dhe kjo shtëpi e madhe ka një rregull të vërtetë dhe unik në aplikimin e tij, pushteti buron nga anëtarët e Partisë Demokratike, jeni ju ata që vendosni në votë përfaqësuesit tuaj dhe drejtuesit tuaj. Kështu ka qenë dhe kështu do të jetë shumë shpejt.