Drejtori Rajonal për Evropën i Organizatës Botërore të Shëndetësisë, Hans Kluge deklaroi për mediat se masat e izolimit mund të evitohen nëse njerëzit ndjekin këshillat e ekspertëve siç është vendosja e maskave. Kluge theksoi se izolimet janë mundësia e fundit,” dhe nxiti publikun të ndjekë udhëzimet shëndetësore për parandalimin e vdekjeve. Ai shtoi se nëse 95% e njerëzve vendosin maska, në vend të rreth 60% që e bëjnë këtë aktualisht në Evropë, “mbylljet e izolimit nuk do të nevojiteshin”, edhe pse shtoi se maska nuk është zgjidhja universale dhe vendosja e saj duhet të kombinohet me masa të tjera. “Nëse ne të gjithë bëjmë pjesën tonë, izolimet totale janë të evitueshme,” tha Kluge. Ai përmendi faktin se aktualisht miliona njerëz po jetojnë sërish në izolime të cilat shkaktojnë vështirësi ekonomike dhe humbje të vendeve të punës, dëmtim të shërbimeve shëndetësore dhe dëme të tjera kolaterale siç është shëndeti mendor, abuzimi me substancat dhe dhuna ndaj grave. Kluge tha se kufizimet në të gjithë kontinentin kanë bërë që numri i rasteve të bjerë nga 2 milionë në 1.8 milionë javën që shkoi. “Është një sinjal i vogël por është diçka. Unë inkurajoj sistemin e ndarjeve te zonave urbane sipas masës së infektimit, për zbatimin specifik te masave,” shtoi ai. Zyrtari i OBSH-së paralajmëroi se impakti negativ zbutet shumë shpejt” prandaj kufizimet duhet të relaksohen në mënyrë graduale. Hans Kluge tha se ka pasur 29,000 vdekje nga koronavirusi në rajon javën që shkoi, e sipas përllogaritjeve, ka pasur një vdekje nga virusi në çdo 17 sekonda. Sipas Kluge vdekjet nga Covid-19 janë rritur me 18% në Evropë në dy javë e fundit, me mesatarisht 4,500 në ditë. Pamjet: AFP