Një pasagjer u arrestua pasi dyshohet se u përpoq të hapte derën e një avioni në mes të fluturimit. Policia tha se incidenti ndodhi në një udhëtim të Cathay Pacific nga Bostoni në Hong Kong. Por avioni u ul në mënyrë të sigurt dhe asnjë pasagjer apo pjesëtar i ekuipazhit nuk u lëndua. Policia e Hong Kongut konfirmoi se kishte arrestuar një mashkull 20-vjeçar nga Kina kontinentale me dyshimin për shkelje të Urdhërave të Sigurisë së Aviacionit. "Ekuipazhi ynë i kabinës menjëherë u mor me situatën, inspektoi derën për t'u siguruar që ishte e mbyllur mirë dhe raportoi incidentin tek autoritetet përkatëse dhe policia," tha Cathay Pacific. “Çështja i është dorëzuar policisë për hetim. “Në Cathay, siguria e pasagjerëve dhe ekuipazhit tonë udhëheq çdo vendim që marrim”. Përpjekjet për të hapur dyert e avionëve gjatë fluturimit konsiderohen gjerësisht si jashtëzakonisht të rrezikshme, megjithëse dyert moderne të avionëve janë projektuar të mbeten të mbyllura nën presionin e kabinës në lartësinë e fluturimit. Në gusht, policia dhe zjarrfikësit pritën në mënyrë dramatike një avion gjigant të Saudia Airlines ndërsa ai ulej në Mbretërinë e Bashkuar, pasi një pasagjer goditi një anëtar të ekuipazhit dhe u përpoq të hapte derën e avionit. Një ushtri pjesëtarësh të skuadrave të emergjencave nxitoi drejt avionit pak sekonda pas uljes, dhe policët arrestuan një pasagjer për rrezikimin e mjetit.