Një bisedë telefonike mes presidentit rus, Vladimir Putin dhe kancelarit gjerman, Olaf Scholz, për luftën në Ukrainë, ka pak mundësi të ndodhë, por do të ishte e mirëpritur, tha një ditë më parë Kremlini. Zëdhënësi i Putinit, Dmitry Peskov, i tha televizionit shtetëror se një bisedë e tillë do t’i mundësonte Berlinit “të paktën për një çast, që t’i shmangej pengesave që ndikojnë në vlerësimin e situatës me maturi”. Por Peskov tha edhe se nuk është duke u diskutuar për një bisedë të tillë. Ai tha se deklaratat e Scholzit për ndonjë bisedë të mundshme telefonike “me siguri kanë qenë hipotetike”. “Është normale për liderët që të bisedojnë me njëri-tjetrin, edhe në kohët më të vështira”, ka thënë Peskov, duke shtuar se “nuk do të ishte keq nëse do të realizohej një debat në mënyrë që ata të mund të dëgjonin pozicionin tonë nga dora e parë”. Lidhjet mes Berlinit dhe Moskës janë përkeqësuar që kur Rusia nisi luftën kundër Ukrainës, në shkurt të vitit të kaluar.