Diku në jug të Ukrainës, ushtarët shkruajnë mesazhe sarkastike mbi një dron që së shpejti do të shënjestronte një anije ruse në Detin e Zi, pjesë e një fushate në zgjerim të Ukrainës për të izoluar Krimenë dhe për të dobësuar përpjekjet luftarake të Moskës. Duke vepruar shumë larg vijës së frontit, njësi të tilla kanë goditur më shumë se 180 anije dhe objektiva të tjerë të transportit detar, rreth gadishullit, gjatë tre javëve të fundit, duke hapur një front të ri lufte. Sulmet, së pari në Detin Azov dhe tani duke u zgjeruar edhe në Detin e Zi, janë të dizajnuara për të rritur koston e pushtimit të Krimesë për Rusinë dhe për të kthyer rrjedhën në favor të Kievit në vitin e pestë të luftës. Sulmet e panumërta janë pjesë e duelit në ujërat strategjike në javët e fundit, gjatë të cilit Rusia ka shtuar sulmet ndaj porteve ukrainase dhe anijeve ndërkombëtare të mallrave. Krimea, e cila shërben si një qendër tranziti dhe ushtarake për trupat e Moskës, është bërë një shënjestër e re për forcat e dronëve të Ukrainës. Në muajt e fundit, ato kanë synuar lidhjet rrugore dhe hekurudhore në një pjesë të Ukrainës jugore të pushtuar që lidh gadishullin me Rusinë, e cila e aneksoi atë në vitin 2014, shumë kohë para pushtimit të plotë të Ukrainës nga Moska në vitin 2022. Kjo ka çuar në mungesa karburanti dhe në një gjendje të jashtëzakonshme në Krime, me objektet e energjisë dhe gazit që janë goditur gjithashtu sistematikisht. Tani, sulmet ndaj cisternave të naftës, anijeve të mallrave e të tjera, shënojnë një zgjerim të përpjekjeve të Kievit për të ushtruar presion mbi forcat ruse duke i lënë ato pa burime. Që nga fillimi i fazës së re të fushatës së tyre në korrik, forcat e dronëve nën komandantin Robert "Magyar" Brovdi kanë raportuar se kanë goditur rreth gjashtë anije në ditë. Brovdi thotë se qëllimi është shembja e mitit të dominimit rus dhe vendosja e kontrollit të plotë mbi ujërat territoriale të ukrainës. Fushata e re quhet "Molochka", që nënkupton frazën "Moska do të bjerë përmes Krimesë".