Shtatë mijë apartamente do të vendosen në dispozicion në paketën e re ligjore për strehimin, të cilat do të mund të merren me kredi të buta. Pas përfundimit të mbledhjes së qeverisë, ministrja Delina Ibrahimaj dha detajet e kësaj nisme qeveritare, duke shtuar se po planifikohet edhe subvencion qeraje për tre mijë apartamente për familjet e reja dhe profesionistët. “Do të jenë 7,000 apartamente të cilat do të vihen në dispozicion në bazë të paketës së re ligjore që ne jemi duke përmbyllur, ku konkretisht do të jenë 4,000 kredi të buta, ku 2,000 do të jenë kredi me zero interes për apartamente të cilat janë deri në 60,000 euro vlerë, ku do t'u jepen profesionistëve të rinj dhe çifteve të reja. Ndërkohë që, për apartamente të cilat janë më të mëdha, duke qenë se vlera 60,000 euro limiton sipërfaqen e apartamenteve, ne duam të bëjmë një politikë të re për të gjitha familjet e reja me një apo më shumë fëmijë, në të cilën do të vihen në dispozicion 3,000 apartamente me një kredi të butë, me një normë interesi 3% fikse.”