U mblodh në Napoli të Italisë Asambleja e 19 Plenare e ERGA-s, Grupi i Rregullatorëve Europianë për Shërbimet Mediatike Audiovizive, ku drejtues të nivelit të lartë të organeve kombëtare rregullatore të pavarura në fushën e shërbimeve audiovizive kishin në fokus rikonsiderimin e të gjithë kuadrit ligjor në përshtatje me dinamikat e zhvillimit të tregut mediatik. Diskutantët prekën aspekte që lidhen me platformat dhe mediat sociale, që të garantojnë në radhë të parë një mjedis më të mbrojtur për të fëmijët, që ata të mos ekspozohen me pornografinë, dhunën, gjuhën e urrejtjes etj. Vëmendje mori dhe procesi i rregullimit sa i takon influencuesve dhe vloggers, si një trend i ri i tregut, që duhet vendosur në hullitë ligjore. Drejtues nga rregullatorët e vendeve të BE-së prezantuan dinamikën e zbatimit në shtetet e tyre të Direktivës 2018/1808, sa i takon vloggerve dhe influencuesve, si pjesë kjo e rregullimit të video sharing platform.