Dy qytetarë dhe 10 zyrtarë të Agjencisë për Zhvillimin e Bujqësisë, që funksionin në kuadër të Ministrisë së Bujqësisë në Kosovë, janë arrestuar në aksionin e Policisë së Kosovës, që nisi në orët e para të mëngjesit të së mërkurës dhe u sekuestruan mbi 400 mijë euro. Të arrestuarit mësohet se kanë poste të ndryshme në agjenci ndërkohë që dyshohen për keqpërdorim të subvencioneve, keqpërdorim i detyrës zyrtare dhe marrje e dhënie ryshfeti. Aksioni i policisë u zhvillua në disa komuna si në Prishtinë, Istog dhe Pejë. Policia ka kryer kontrolle edhe në shtëpitë e personave të arrestuar dhe sipas Kryeprokurorit të Shtetit Aleksandër Lumezi, bëhet fjalë për një shumë parash deri në 400,000 eurove. "Të arrestuarit dyshohen për disa vepra penale, për keqpërdorim të subvencioneve, për marrje të ryshfetit dhe keqpërdorim të detyrës zyrtare", ka deklaruar Lumezi. Lumezi, dha detaje lidhur me aksionin, dhe tha se nga muaji janar ka filluar grumbullimi i informacioneve dhe provave. Drejtori i Krimeve Ekonomike dhe Korrupsion, Nazmi Sahiti, tha se në aksionin e sotëm janë rreth 400 mijë euro që janë sekuestruar.