Një 46 vjeçar nga Kosova, është arrestuar në Kralevë në Serbinë qendrore, nën dyshimin se ka kryer veprën penale të spiunazhit, ka raportuar agjencia Tanjug. Sipas të dhënave të kësaj agjencie, Gjykata e Lartë në Kralevë e ka lënë në paraburgim për 30 ditë. Sipas raportimeve të mediave, 46-vjeçari dyshohet se për një kohë të gjatë ka bashkëpunuar me shërbimin informativ në Kosovë. Po ashtu raportohet se ai ka mbledhur dhe ka dorëzuar të dhëna dhe informacione mbi aktivitetet e pjesëtarëve të dikurshëm dhe aktualë të Ushtrisë së Serbisë, MPB-së të Serbisë dhe strukturave të tjera të sigurisë së shtetit serb. Në lidhje me arrestimin e këtij shtetasi, ka reaguar ministri në detyrë i Punës, Andin Hoti, për të cilin pretendon se ka ndihmuar në zbulimin e një varreze të dyshuar masive të dyshuar në Kosovë si “tentim-vrasje ndaj së vërtetës”. “Ky nuk është shtet që kërkon drejtësi. Ky është një aparat shtetëror që vazhdon të mbrojë kriminelët, të frikësojë dëshmitarët dhe të pengojë zbardhjen e fatit të personave të zhdukur. Çdo arrestim i tillë dërgon një mesazh të qartë: kush flet për varrezat masive, ndëshkohet”, shkroi Hoti në Facebook.