Kosova ka mbyllur procesin e votimit për zgjedhjet lokale. Sipas të dhënave të para të publikuara nga Komisioni Qendror i Zgjedhjeve kanë votuar 791 mijë e 123 qytetarë, që përfaqësojnë 39.07% të më shumë se 2 milionë e 25 mijë votuesve me të drejtë vote. Kryetari i KQZ-së, Kreshnik Radoniçi njoftoi se procesi i votimit ka përfunduar në orën 19:00, ashtu sicc ishte parashikuar. Ai theksoi se dita e zgjedhjeve është zhvilluar e qetë dhe në përputhje me kërkesat ligjore, pa incidente që do të mund të cenonin integritetin apo besueshmërinë e procesit. Kryeministri në detyrë dhe kryetari i Lëvizjes Vetëvendosje, Albin Kurti ka reaguar duke thënë se qytetarët e Kosovës dëshmuan edhe njëherë kulturën demokratike duke kaluar ditën e zgjedhjeve lokale me dinjitet e përgjegjësi. “Ky besim është forca jonë për të vazhduar me punë e përkushtim përpara. Tash është koha e komisionerëve dhe vëzhguesve, të cilët jo vetëm i numërojnë votat, por edhe i ruajnë ato dhe vullnetin e shprehur të qytetarëve,” ka shkruar Kurti. Pas mbylljes së votimit, kryetari i Partisë Demokratike të Kosovës, Memli Krasniqi, ka falënderuar qytetarët për mbështetjen që i dhanë kësaj force politike në zgjedhjet lokale. Edhe sipas një reagimit të policisë së Koosvës, zgjedhjet për lokale janë zhvilluar në një atmosferë të qetë dhe pa incidente serioze.