Ish-kryeministri Sali Berisha, njëherësh kryetari i zgjedhur i Partisë Demokratike, zhvilloi këtë të shtunë një takim online me personalitetet e diasporës shqiptare. Në fjalën hyrëse të tij, Berisha hodhi një sërë akuzash ndaj kryeministrit Edi Rama, që sipas tij po rikthen monizmin, duke nisur që nga zhdukja e votës brenda partisë. SINK Ne kemi thirrur protestë më datën 7 korrik dhe jemi të vendosur që krahas të gjitha formave të tjera të opozitarizmit, të përdorim edhe protestën, si një kusht të domosdoshëm për të çmontuar këtë regjim që ka uzurpuar të gjitha pushtetet pa votën e lirë. Ju besoj jeni informuar se PS përjashtoi këtë vit përfundimisht votën e lirë brenda saj. Lideri demokrat e konsideroi emigracionin një plagë të shoqërisë dhe qeverinë, nxitëse të shpopullimit. SINK “Kombi sot është shndërruar në një komb që rrit fëmijë për emigracion, në një kohë kur ju e dini mirë potencialet e jashtëzakonshme që ka Shqipëria si rrallë ndonjë vend tjetër me resurset e saj.” Duke u ndalur tek Ballkani i Hapur, Berisha u shpreh se ai është një projekt rus, teksa hodhi akuza ndaj Ramës, se po punon kundër Kosovës. SINK “U themelua në Novisad para tre vitesh si mini-shengen nga Serbia, Shqipëria e Maqedonia, aleancë trelaterale. Harta që u paraqit atë ditë, nga kjo trojkë, Vuçiç-Rama-Zaev, paraqiste Kosovën haptaz pjesë të territorit të Serbisë. Këtë hartë e publikoi në Facebook-un e tij edhe Rama. Më vonë tha se ma publikuan gabimisht asistentët. Ky projekt sipas Vuçiç disa ditë pas samitit të Novisadit, u quajt Jugosllavia e vjetër plus Shqipërinë, rikthim te doktrina apo ideja se Ballkanin e stabilizon hegjemonizmi serb. Hegjemonizëm që u vendos në dekadën e dytë të shekullit të shkuar dhe përfundoi me luftërat më të përgjakshme të përsëritura në rajon. Për më tepër ky projekt me influencë ruse. Por çfarë do të ndodhë me votën e diasporës? SINK "Në 2013 bëmë gati ligjin ku pranonim votimin online të emigrantëve të Diasporës, aty ku ishin. Rama kërcënoi në mënyrë ultimative se do bojkotonte zgjedhjet nëse ky ligj kalonte. Në këto rrethana u detyrova të pranoj ultimatumin e tij. Sot ju garantoj se nuk do ketë zgjedhje në Shqipëri pa votën tuaj". Ndërkohë Berisha kundërshtoi sërish legalizimin e kanabisit, që sipas tij synon legalizimin e parasë së krimit.