Retorika e fushatës elektorale dhe diskursi i njerëzve kyç të politikës së jashtme, si nga krahu i Kamala Harris, ashtu edhe nga ana e Donald Trump nuk premtojnë kohë më të mira për Kosovën. Harris, zv.presidentja aktuale e Shteteve të Bashkuara të Amerikës e ka përqëndruar politikën e jashtme te Ukraina dhe Lindja e Mesme, dy çështje kryesore që tërheqin më shumë vëmendjen e votuesve amerikanë. Donald Trump, këtyre dy fronteve të diplomacisë u ka shtuar edhe Kinën, ndërsa për Kosovën ai vetë nuk ka folur drejtpërdrejt, por njerëzit e konfiguruar nga opinioni publik si lojtarët kyçë të politikës së tij të jashtme nuk dërgojnë sinjale pozitive. Nëse me një fitore të Harris Kosova parashikon një ruajtje të status quo-së aktuale, me Donald Trump mund të rikthehet teza e shkëmbimit të territoreve, të paktën sipas retorikës së shprehur nga Richard Grenell, ish i dërguari i posaçëm i Shtëpisë së Bardhë për Ballkanin.