Qeveria e Kosovës vendosi të zgjasë me një javë procesi ne regjistrimit të popullsisë. Vendimi u mor pas kërkesave të bëra nga ana e dhjetëra komunave. Sipas njoftimit të qeverisë ky proces do të zgjasë deri më 24 maj edhe pse ishte parashikuar të mbyllej këtë të premte. “Sipas propozimit të Agjencisë së Statistikave të Kosovës, prej datës 18 deri më 24 maj 2024, regjistrimi/intervistat do të zhvillohen vetëm nga stafi i rregullt i Agjencisë së Statistikave të Kosovës, i cili do të mbulojë tërë territorin e Kosovës për rastet kur identifikohet një individ apo ekonomi familjare, që për çfarëdo arsye, nuk mund të regjistroheshin më herët”, thuhet në njoftim. Qeveria vendosi gjithashtu që të zgjasë deri më 31 gusht edhe procesin e regjistrimit të diasporës. Sipas Agjencisë së Statistikave të Kosovës deri në fillim të kësaj jave në të gjithë vendin janë regjistruar mbi 1 milion e 420 mijë banorë. Ndërsa, mbi 400.000 pjesëtarë të diasporës janë regjistruar përmes plaformës online.