Të dhënat zyrtare nga Dogana e Kosovës tregojnë se deficiti tregtar është thelluar gjatë 8-mujorit të parë të vitit 2026, krahasuar me të njëjtën periudhë në dy vitet paraprake. Nga janari deri në gusht 2026, vlera e importeve totale arriti në 4 miliardë e 970 milionë euro, ndërsa eksportet në 726.5 milionë euro. Si rezultat, deficiti tregtar arriti në 4.25 miliardë euro, pa përfshirë shërbimet, sipas KosovaPress. Krahasuar me 8-mujorin e vitit 2025, kur deficiti ishte rreth 3.73 miliardë euro, hendeku tregtar është rritur me rreth 520 milionë euro. Ndërsa, në raport me periudhën janar-gusht 2024, kur deficiti ishte 3.43 miliardë euro, rritja është mbi 800 milionë euro. Sipas të dhënave, importet në vitin 2026 arritën nivelin më të lartë në korrik, me 717 milionë euro, pasuar nga gushti me 665.4 milionë euro. Kina dhe Gjermania kryesojnë listën e furnizuesve të Kosovës. Importet nga Kina arritën në 674.7 milionë euro, ndërsa nga Gjermania në 670.2 milionë euro. Në anën tjetër, produktet vendore vazhduan të gjejnë treg kryesisht në vendet e rajonit. Eksportet drejt Maqedonisë së Veriut arritën në 119.3 milionë euro, ndërsa drejt Shqipërisë në 118.7 milionë euro.