Sokol Halili, autor i vrasjes së ish bashkëshortes së tij që ishte 41 javëshe shtatzënë, Hamide Magashi, në oborrin e maternitetit në prishtinë, rrezikon burg të përjetshëm megjithatë, sipas njohësve të ligjit, ky dënim mund të evitohet vetëm nëse i dyshuari vetëdorëzohet. Dënimi me burg të përjetshëm, do të përbënte kështu të parin të këtij lloji në Kosovë. Ngjarja ndodhi mbrëmjen e të mërkurës, rreth orës 18.00, kur Sokol Halili qëlloi me armë zjarri ish bashkëshorten e tij shtatzënë, Hamide Magashi, pikërisht para maternitetit të Prishtinës. 35 vjecarja ishte në javët e fundit të shtatzënisë dhe kishte shkuar në Maternitet për një kontroll rutinë. Por atje është përballur me ish bashkëshortin, i cili e ka qëlluar disa herë me armë por dy kanë qenë plumbat fatalë që i kanë marrë jetën asaj dhe fëmijës ende të palindur. Halili dhe Magashi kishin më pak se një vit të martuar dhe po prisnin fëmijën e tyre të parë. Por martesa e tyre kishte probleme dhe Magashi kishte kërkuar divorcin. Ngjarja ka tronditur opinionin publik në Kosovë e madje edhe përtej saj dhe në prishtinë, është organizuar edhe një protestë nën moton: Vrasja e grave nga burrat, urgjencë kombëtare. Ndërkohë, qeveria e kosovës do të diskutojë ngjarjen në një mbledhje të posacme, njoftuar kjo nga ministrja e drejtësisë Albulena Haxhiu. “Këto krime të rënda na bëjnë të kuptojmë që femicidi është i përhapur në shoqërinë tonë”, tha Haxhiu duke shprehur më pas ngushëllimet për familjarët e duke kërkuar dënim maksimal për autorin. “Ajo grua, që priste të sillte në këtë botë një fëmijë, duhej të mbrohej...por u shua bashkë me fëmijën ende të palindur”, tha Haxhiu. Pas krimit makabër kanë reaguar edhe bluzat e bardha të kosovës...Një kardiokirurg nga QKUK-ja Loeonard Bytyqi, tha se janë të shumtë personat duhet të kërkojnë falje publike e të japin dorëheqjen, pasi sipas tij rasti i rëndë dëshmon se Kosova ka dështuar si shtet, si shoqëri.