Investimet në infrastrukturë dhe në fushën e shëndetësisë, janë premtime që dominuan në fushatën zgjedhore të kandidatëve për kryetarë të komunave më të mëdha, për zgjedhjet lokale të 17 tetorit në Kosovë. Por, përderisa premtimet për investime në infrastrukturë, mund të jenë të realizueshme, premtimet në fushën e shëndetësisë, e sidomos ato që kanë të bëjnë me çështjen e luftës kundër pandemisë së koronavirusit, nuk janë në kompetencat e pushtetit lokal, vlerësojnë ekspertët e institutit GAP. Ky i fundit ka mbikqyrur fushatat zgjedhore dhe premtimet e kandidatëve për kryetarë në të gjitha komunat në kosovë. Gara më e madhe ka qenë ajo për komunat e mëdha: Prishtinë, Prizren, Pejë, Gjakovë, Mitrovicë, Gjilan dhe Ferizaj, e të cilat njëkohësisht njihen si komuna që përfaqësojnë shtatë rajonet e Kosovës. Premtimet e kandidatëve kanë qenë të pafundme dhe kryesisht janë përqendruar tek infrastruktura, investimet në shëndetësi, përmirësimi i ambjentit, ekonomia dhe mbështetja e bizneseve të vogla dhe të mesme, mbështetja e të rinjve, sportit, kulturës e të tjera. Ndërtimi i parqeve dhe hapësirave të gjelbra, ndriçimi i të gjitha rrugëve dhe hapësirave publike, zhvillimi i pikave të caktuara turistike nëpër komuna, zgjidhja e problemeve të ujit të pijshëm, impianteve për ujërat e zeza dhe kanalizimeve, zgjidhja e problemit me qentë endacakë, ndërtimi i zonave industriale dhe të tjera, janë premtime që janë bërë thuajse nga shumica e kandidatëve për kryetarë në të gjitha komunat e mëdha të Kosovës. Sipas të dhënave nga Komisioni Qendror i Zgjedhjeve, për zgjedhjet lokale të 17 tetorit, për kryetarë të 38 komunave të Kosovës janë certifikuar 166 kandidatë. Në garën për kuvendet e komunave janë certifikuar ndërkohë 5,198 kandidatë.