Mes një bote në kaos dhe riorganizim, siguria është kthyer në prioritet absolut, dhe për Kosovën, ajo lidhet drejtpërdrejt me NATO-n, aleancën më të madhe ushtarake në botë. Sipas REL, afrimi i kosovës me naton po merr hov në qendrat e vendimmarrjes në Uashington, megjithatë shfrytëzimi i momentit duket se kërkon shtytje më të fortë politike edhe nga Prishtina. Për ish-ministrin e Mbrojtjes së Shqipërisë, Fatmir Mediu, mbështetja nga Uashingtoni përbën një mundësi të rëndësishme. Por, sipas tij, ajo humbet peshë nëse Kosova nuk siguron stabilitet të brendshëm institucional. Anëtarësimi në NATO kërkon, para së gjithash, konsensus politik dhe qasje të koordinuar nga vetë Kosova. “Pa një Kosovë me institucione, pa një Kosovë me politikë dhe Qeveri të qëndrueshme, do të jetë e vështirë të hapet rruga për anëtarësimin në NATO”, thotë Mediu për Radion Evropa e Lirë. Në fund të prillit, në Kongresin amerikan u hodh një hap konkret: përfaqësuesi Keith Self, bashkë me kolegët e tij, Ritchie Torres dhe Mike Laëler, propozuan një rezolutë që synon ta shtyjë përpara rrugën e Kosovës drejt NATO-s.