Kryeministri në detyrë i Kosovës, Albin Kurti, dhe kreu i Lidhjes Demokratike të Kosovës, Lumir Abdixhiku, nuk kanë arritur një marrëveshje politike pas takimit të zhvilluar këtë të hënë, por palët kanë lënë të hapur mundësinë e vijimit të negociatave për krijimin e institucioneve të reja. Takimi mes dy liderëve zgjati mbi tri orë dhe u zhvillua dy ditë para seancës konstituive të legjislaturës së 11-të të Kuvendit të Kosovës. Pas takimit, Kurti tha se nuk ka pasur dakordësi konkrete, por palët kanë diskutuar për mundësitë e një marrëveshjeje që do të respektonte rezultatin zgjedhor dhe do të garantonte funksionimin e institucioneve. “Një marrëveshje politike nuk kemi. Diskutuam për qasje të ndryshme dhe mundësitë që i kemi përpara. Kemi nevojë për një marrëveshje që respekton rezultatin zgjedhor dhe e shndërron atë në kontribut për stabilitet institucional”, deklaroi Kurti.