Mesnata e 17 majit shënon edhe afatin e fundit për regjistrimin e votuesve nga diaspora për zgjedhjet e 7 qershorit në kosovë. Qytetarët që jetojnë jashtë Kosovës mund të votojnë në dy forma: përmes postës ose në përfaqësi diplomatike. Votimi me postë do të zhvillohet nga 25 maji dhe do të zgjasë 12 ditë, deri më 6 qershor. Ndërkohë, votimi në përfaqësi diplomatike do të mbahet një ditë para zgjedhjeve në Kosovë, më 6 qershor, nga ora 07:00 deri në 19:00. Në zgjedhjet e fundit të mbajtura në dhjetor, numri i aplikimeve për regjistrim të votuesve jashtë vendit kishte kaluar mbi 70 mijë. Po ashtu, nga 6 maji ka nisur edhe periudha për ndërrimin e qendrave të votimit brenda komunës, si dhe për konfirmimin ose kundërshtimin e pasaktësive në listën e votuesve. Komisioni Qendror i Zgjedhjeve e ka miratuar tashmë Listën Paraprake të Votuesve për zgjedhjet e parakohshme që do të mbahen më 7 qershor. Lista përmban 2,092,202 votues, pra 15,912 votues më shumë në krahasim me zgjedhjet e parakohshme për Kuvendin e Kosovës, të mbajtura më 28 dhjetor 2026. KQZ, një ditë më parë, ka certifikuar 902 kandidatë për deputetë nga 21 subjekte politike.