Qeveria e Kosovës i hodhi poshtë pretendimet e Listës Serbe, partisë më të madhe të serbëve në Kosovë, se kryeministri Albin Kurti, po përgatit dërgimin e forcave të tij speciale “për të përndjekur” serbë nga pjesa veriore e vendit. “Absolutisht e pavërtetë”, tha zëdhënësi i Qeverisë, Përparim Kryeziu. Shpifje të tilla, sipas tij, kanë për qëllim “justifikimin dhe mbajtjen e barrikadave në veri të vendit”, të cilat “duhet të largohen menjëherë”. “Ftojmë qytetarët tanë në veri që t’i ndjekin njoftimet dhe t’u besojnë institucioneve tona dhe të mos bien pre e dezinformimit të grupeve kriminale, që synim kanë ta mbrojnë vetëm veten”, tha Kryeziu. Më herët, udhëheqësi i Listës Serbe, Goran Rakiq, tha se në bazë të informacioneve që ka, Kurti do të dërgonte forca të armatosura, përfshirë njësinë speciale, në veri të Kosovës, “për të përndjekur popullin tonë”. Në këtë pjesë të Kosovës, të banuar me shumicë serbe, disa banorë lokalë kanë ngritur barrikada dhe kanë bllokuar rrugët nga e shtuna pasdite. Ata e ndërmorën këtë veprim pas arrestimit të ish-policit serb, Dejan Pantiq, nën dyshimet se ka organizuar “sulm terrorist” në zyrat e Komisionit Qendror të Zgjedhjeve në veri të Kosovës. Qeveria e Kosovës, SHBA-ja dhe Mbretëria e Bashkuar kanë bërë thirrje për largimin e mënjëhershëm të barrikadave.