Shqipëria ka plotësuar 9 nga 10 rekomandimet e Këshillit të Europës në luftën kundër korrupsionit. Në seancën plenare të organizmit të Këshillit të Europës kundër korrupsionit u diskutua për Shqipërinë dhe masat që ka marrë vendi ynë në luftë kundër këtij fenomeni, sidomos në lidhje me anëtarët e Parlamentit, gjyqtarët dhe prokurorët. Sipas këtij raporti, pas 4 vjet monitorimi Këshilli i Europës arriti në përfundimin se Shqipëria ka zbatuar në mënyrë të kënaqshme ose ka trajtuar në mënyrë të kënaqshme 9 nga 10 rekomandimet e përfshira në Raportin e saj të mëparshëm. Sipas raportit, Kuvendi gjatë kësaj kohe ka punuar për të adresuar dy rekomandimet, të cilat lidheshin me parandalimin e korrupsionit në radhët e deputetëve. Organizmi antikorrupsion i Këshillit të Europës ka mirëpritur ndryshimet në Rregulloren e Kuvendit si dhe ka mirëpritur ngritjen e sistemit për ofrimin e këshillimit për parlamentarët lidhur me çështjet e etikës.