Autoritetet italiane kanë arrestuar ish Ambasadorin e Romës në Uzbekistan nën akuzën e korrupsionit. Diplomati Piergabriele de Bottini dyshohet se përmes një bashkëpunëtoreje uzbeke u ka ofruar viza shtetasve rusë në një kohë që BE ndaloi hyrjen e tyre për shkak të luftës në Ukrainë. Hetimi ka zbuluar se diplomati italian përfitonte deri në 16 mijë euro nga rusët përmes ndërmjetëses së tij në Ambasadën e Italisë në Tashkent. Përfitimet siguroheshin nga operimi i një sistemi paralel për lëshimin e vizave përmes agjencive ruse. Nën hetim janë afërsisht 400 aplikime dhe asete të vlerësuara në afërsisht 3 milionë euro në total. Prokuroria thotë se ambasadori siguronte për rusët dokumente që të hynin në zonën Shengen pavarësisht se, sipas prokurorisë, nuk i plotësonin kërkesat e nevojshme. Sistemi i dyshuar ishte i organizuar brenda zyrës së vizave të Ambasadës Italiane në Uzbekistan. Mediat italiane raportojnë se në dëshminë e parë të tij, De Bottini ka pranuar akuzat duke thënë se ‘i duheshin para’.