Ministri i Shëndetësisë i Kroacisë, Vili Beros, u arrestua këtë të premte pasi akuzohet për korrupsion. Kryeministri i vendit njoftoi se e shkarkoi Beros menjëherë pasi u njoh me provat dhe më pas ai u prangos. Ndërkohë avokatja e tij mbrojtëse mohoi akuzat duke theksuar se klienti i saj nuk pranon asgjë nga ato se çfarë pretendon organi i akuzës. Zyra e Prokurorit Publik Evropian (EPPO) tha se ka nisur një hetim ndaj tetë personave, përfshirë Berosin dhe drejtorët e dy spitaleve në Zagreb, nën dyshimin për ryshfet, abuzim të detyrës dhe pastrim parash. Ndërkohë një hetim paralel për të njëjtat vepra po zhvillohet dhe nga prokurori i shtetit të Kroacisë, Ivan Turudiç i cili tha se prokurorët evropianë nuk e kishin njoftuar zyrën e tij ose USKOK-un për hetimin e tyre. EPPO-ja deklaroi se një grup kriminal, i cili kërkonte të siguronte financim për shitjen e pajisjeve robotike mjekësore në disa spitale, dyshohet se u kishte dhënë ryshfet zyrtarëve për të fituar kontrata për projekte, duke përfshirë ato të financuara nga BE-ja.