Koreja e Veriut ka lëshuar disa raketa lundrimi në det. Ky është testimi i pestë i armëve të tilla që nga janari, sipas ushtrisë koreano jugore, testime që kanë rritur tensionet në rajon. Shtabi i Përgjithshëm i Koresë së Jugut tha se së bashku me ushtrinë amerikane po analizojnë lëshimet e raketave që u pikasën në ujërat në verilindje dhe në lindje të qytetit Vonsan. Ushtria koreano jugore nuk ofroi detaje për numrin e saktë të raketave të lëshuara apo sa gjatë fluturuan ato. Ende është e paqartë ndërkohë nëse raketat u lëshuan nga toka apo nga deti. “Ushtria jonë ka rritur vigjilencën dhe po punon ngushtë me partnerët amerikanë, duke monitoruar nga afër sinjalet e aktivitetit të mëtejshëm nga Koreja e Veriut”, tha Shtabi i Përgjithshëm i ushtrisë së Koresë së Jugut. Ekspertët kanë thënë se Koreja e Veriut po rrit presionin ndaj rivalëve në vitin kur Koreja e Jugut dhe SHBA mbajnë zgjedhje presidenciale, duke tentuar që të detyrojë Uashingtonin që të pranojë idenë që Veriu është një fuqi bërthamore dhe të sigurojë lëshime ekonomike dhe lëshime sigurie nisur nga ky pozicion. Lideri koreano verior, Kim Jong Un, ka lëshuar kërcënime të ashpra ndaj Koresë së Jugut, përfshirë edhe deklaratën se ai do të heqë dorë nga objektivi për pajtim me fqinjin jugor apo se do të asgjësojë Jugun me armë bërthamore nëse e provokon.