Koreja e Veriut tha të enjten se ka testuar një raketë të re kruiz, ndërsa zgjeron aftësitë e saj ushtarake përballë thellimit të tensioneve me Shtetet e Bashkuara dhe fqinjët. Raporti në median shtetërore erdhi një ditë pasi ushtria e Koresë së Jugut tha se kishte interceptuar disa raketa kruiz të lëshuara nga fqinji verior në ujërat e bregdetit perëndimor. Nuk u dhanë më shumë detaje lidhur me numrin e raketave të lëshuara ose karakteristikat e tyre të fluturimit. Media shtetërore e Koresë së Veriut tha se raketa “Pulhëasal-3-31” është ende në fazën e saj të zhvillimit dhe se testimi nuk përbën kërcënim për fqinjët. Koreja e Veriut përshkroi raketën si "strategjike". Lee Sung Joon, zëdhënës i shefave të Shtabit të Përbashkët të Koresë së Jugut, tha se raketat fluturuan në një distancë më të shkurtër se raketat e lëshuara nga Koreja e Veriut më parë, dhe sipas tij, Veriu po përpiqet të përmirësojë performancën e sistemeve ekzistuese. Analistët thonë se Koreja e Veriut po përpiqet të nxjerrë në pah arsenalin e saj të armëve me aftësi bërthamore, për të rritur presionin ndaj kundërshtarëve. Koreja e Veriut kreu testimin e parë të një rakete kruiz për sulme të mundshme bërthamore në shtator 2021. Prej atëherë, Koreja e Veriut ka kryer të paktën dhjetë raunde testimesh të atyre që i përshkruan si raketa kruiz me rreze të gjatë të lëshuara nga toka dhe nga deti. Raketat kruiz të Koresë së Veriut priren të tërheqin më pak interes sesa raketat balistike, sepse ato nuk janë të ndaluara në mënyrë specifike nga ndonjë rezolutë e Këshillit të Sigurimit të OKB-së. Analistët, megjithatë, argumentojnë se raketat kruiz me rreze të mesme veprimi nuk janë më pak kërcënim sesa raketat balistike, dhe sipas tyre janë një kërcënim serioz nga Koreja e Veriut.