Udhëheqësi i Koresë së Veriut Kim Jong Un ka vlerësuar trupat e tij që luftojnë jashtë vendit si farkëtues të një "aleance të pamposhtur" me Rusinë në një mesazh të Vitit të Ri, thanë mediat shtetërore të enjten. Pheniani ka dërguar mijëra trupa për të mbështetur pushtimin gati katërvjeçar të Ukrainës nga Rusia, sipas agjencive të inteligjencës së Koresë së Jugut dhe Perëndimit. Të paktën 600 kanë vdekur dhe mijëra të tjerë kanë pësuar lëndime, sipas vlerësimeve. Analistët thonë se Koreja e Veriut po merr ndihmë financiare, teknologji ushtarake dhe furnizime ushqimore dhe energji nga Rusia në këmbim. Kim Jong un vlerësoi njerëzit e tij që luftojnë në "tokë të huaj", duke përgëzuar mbrojtjen e tyre "heroike" të nderit të kombit dhe duke i udhëzuar ata të "jenë të guximshëm", tha të enjten Agjencia Qendrore Koreane e Lajmeve, KCNA. "Ndërsa i gjithë vendi është i mbështjellë në një atmosferë festive për përshëndetjen e vitit të ri, më mungoni edhe më shumë, ju që po luftoni me trimëri në fushat e betejës në tokën e huaj edhe në këtë moment", tha ai, sipas KCNA. "Pas jush janë Pheniani dhe Moska", tha Kim.