Kim bëri thirrje për një zgjerim të arsenalit bërthamor të Koresë së Veriut dhe një rritje të testimit të raketave balistike. Ai premtoi se do të lëshojë tre satelitë të rinj spiunë. Në fjalimin e tij, Kim akuzoi Korenë e Jugut dhe Shtetet e Bashkuara të Amerikës se po përgatiten për një "pushtim" dhe paralajmëroi se "lufta në Gadishullin Korean mund të shpërthejë në çdo kohë". Koreja e Veriut testoi një numër rekord raketash në vitin 2023, duke përfshirë atë që pretendoi në dhjetor se ishte një raketë balistike ndërkontinentale me aftësi bërthamore që mund të godiste objektivat kudo në Shtetet e Bashkuara të Amerikës. Në fund të vitit të kaluar, ajo lëshoi një satelit spiun në orbitë. Koreja e Veriut njoftoi se kishte lëshuar me sukses një raketë balistike hipersonike me rreze të mesme veprimi një javë më parë. Koreja e Jugut tha po ahstu më 6 janar se Koreja e Veriut kishte gjuajtur të paktën 60 predha artilerie në ujërat pranë ishullit të Koresë së Jugut të Jeonpyeong, afër kufirit midis dy Koreve. Përveç kësaj, satelitët amerikanë kanë zbuluar modernizimin dhe zgjerimin e një kompleksi kimik të Koresë së Veriut të lidhur me prodhimin e kimikateve të përdorura për karburantin e raketave dhe përbërësve të armëve bërthamore. Në dhjetor, Agjencia Ndërkombëtare e Energjisë Atomike raportoi se një reaktor i dytë bërthamor në Yongbyon ishte funksional dhe mund të përdoret për të prodhuar ngarkesa armësh. "38 North", një faqe interneti e drejtuar nga instituti Stimson me qendër në Uashington, paralajmëroi se lëvizjet e fundit të Kim jong un shkojnë përtej propagandave të zakonshme. Ekspertët paralajmërojnë se situata e sigurisë në gadishullin korean është më e rrezikshmja që nga qershori 1950 kur edhe shpërtheu lufta koreane. "Kjo mund të tingëllojë tepër dramatike, por ne besojmë se, ashtu si gjyshi i tij në vitin 1950, Kim Jong Un ka marrë një vendim strategjik për të shkuar në luftë”, thonë ekspertët duke shtuar se nuk e dinë se kur apo si Kim jong un do të tërheqë këmbëzën, por rreziku është më i madh se paralajmërimet rutinë në Uashington, Seul dhe Tokio për ‘provokimet' e Phenianit”.