Ushtria e Koresë së Jugut beson se Koreja e Veriut po përgatitet të dërgojë trupa shtesë në Rusi, si edhe më shumë pajisje ushtarake që mund të përfshijnë "dronë kamikaze", si pjesë e planit të saj për të mbështetur Moskën në luftën kundër Ukrainës, sipas një dokumenti botuar sot. "Një vlerësim i plotë i inteligjencës tregon se Koreja e Veriut po përgatitet të dërgojë akoma më shumë trupa ushtarake në Rusi ndërkohë që do të vazhdojë furnizimin e vendit me raketahedhës 240 milimetërsh dhe artileri vetëlëvizëse 170 milimetërshe," zbulon një dokument i publikuar të hënën nga shefat e përbashkët të shtabit të koresë së jugut, i titulluar "Tendencat e fundit ushtarake në Korenë e Veriut". “Ka gjithashtu disa shenja se Pheniani po planifikon të prodhojë dronë kamikazë dhe të furnizojë me ta moskën”, shton raporti, duke ia atribuar lëvizjen përpjekjeve të Veriut për të fituar përvojë praktike në luftë dhe për të modernizuar sistemin e tij të armëve konvencionale. Sipas Seulit, në këmbim të dërgimit të trupave të saj në frontin ukrainas për të luftuar përkrah trupave të Moskës, Koreja e Veriut mund të marrë raketa kundërajrore dhe sisteme të tjera të mbrojtjes ajrore nga Rusia.