Top News – Koreja e Veriut dështon, raketa bie në det / Sirenat e alarmit shkaktojnë panik në Seul

Përpjekja e Koresë së Veriut për të lëshuar në orbitë satelitin e parë spiun të vendit duket se ka dështuar. Ky dështim shihet si një pengesë ndaj ambicieve të liderit Kim Jong Un për të rritur aftësitë e tij ushtarake në kohën kur tensionet me Shtetet e Bashkuara të Amerikës dhe Korenë e Jugut po rriten. Pas pranimit jashtëzakonisht të shpejtë të dështimit të saj, Koreja e Veriut shprehu synimin për të vazhduar me një lëshim të dytë, duke synuar të korrigjojë problemet e hasura gjatë ngritjes fillestare të raketës. Kjo deklaratë nënkupton se Kim Jong Un mbetet i vendosur në përpjekjet e tij për të zgjeruar armatimin e vendit dhe për të ushtruar presion shtesë si ndaj Uashingtonit ashtu edhe ndaj Seulit, veçanërisht në një periudhë ku negociatat diplomatike kanë ngecur. Sirenat e alarmit jehuan në seul ndërkohë që Koreja e Jugut dhe Japonia u kërkuan fillimisht banorëve të strehohen në vende të sigurta gjatë nisjes së satelitit. Sipas ushtrisë së Koresë së Jugut, po bëhen përpjekje për të rikuperuar një objekt që besohet të jetë një fragment i raketës së rrëzuar koreano-veriore. Ministria e Mbrojtjes shpërndau fotografi të një cilindri të bardhë, metalik, duke e identifikuar atë si një përbërës të dyshuar të raketës. Sipas vëzhguesve, një lëshim satelitor nga Koreja e Veriut shkel rezolutat e Këshillit të Sigurimit të Kombeve të Bashkuara, të cilat e ndalojnë vendin të angazhohet në çdo lëshim duke përdorur teknologji balistike.