Koreja e Jugut po shqyrton nëse do t'i bashkohet planit të Presidentit amerikan Donald Trump për të ndihmuar anijet të kalojnë tranzit nëpër Ngushticën e Hormuzit, tha një zyrtar të martën, pas një shpërthimi në një anije të operuar nga Seuli në rrugën ujore. Trump fajësoi një sulm iranian për incidentin e së hënës ndërsa Ministria e Jashtme e Koresë së Jugut tha se shkaku i zjarrit do të konfirmohej vetëm pasi anija të tërhiqej përsëri në port. Anija e mallrave me flamur të Panamasë e operuar nga një kompani koreanojugore ishte bosh dhe me spirancë të lëshuar kur ndodhi shpërthimi. Ministria tha se nuk kishte viktima dhe se zjarri ishte shuar. Anija, e quajtur HMM Namu, do të tërhiqet në një port aty pranë për një vlerësim të dëmeve dhe riparime. Koreja e Jugut beson se "siguria e rrugëve ndërkombëtare detare dhe liria e lundrimit duhet të mbrohen sipas ligjit ndërkombëtar", tha një sekretare presidenciale, duke vënë në dukje pjesëmarrjen e Seulit në përpjekjet ndërkombëtare për të normalizuar zinxhirët globalë të transportit detar. "Në këtë kontekst, ne po e ndjekim këshillat e Presidentit Trump në lidhje me këtë", tha ajo. Në një deklaratë nga Shtëpia Blu konfirmohej po ashtu se po shqyrtohej sugjerimi i Trump për të marrë pjesë në një plan për të siguruar lundrimin e lirë në ngushticë. Në një postim në mediat sociale, Trump tha se Irani qëlloi një anije të operuar nga Koreja e jugut dhe objektiva të tjera ndërsa SHBA-të nisën operacionin e tyre për të hapur ngushticën. Ai sugjeroi që Koreja e Jugut mund t'i bashkohej përpjekjes. Qeveria e Koresë së Jugut ka thënë se 26 anije me flamur të Koresë së Jugut janë të bllokuara rreth Ngushticës së Hormuzit.