Koreja e Jugut mund të konsiderojë furnizimin me armë të Ukrainës si pjesë e masave për të kundërshtuar lidhjet ushtarake mes Koresë së Veriut dhe Rusisë, thanë zyrtarët të martën, pasi akuzuan Penianin për dërgimin e trupave për të luftuar për llogari të Rusisë në Ukrainë. Agjencia e spiunazhit të Koresë së Jugut tha javën e kaluar se Koreja e Veriut kishte dërguar 1,500 trupa speciale në Lindjen e Largët të Rusisë për stërvitje në bazat ushtarake lokale, nga ku më pas mund të dislokohen në vijën e frontit në Ukrainë. Zyra e presidentit Yoon Suk Yeol tha se po merreshin masa diplomatike, ekonomike dhe ushtarake sipas skenarëve të ndryshëm të bashkëpunimit ushtarak midis Phenianit dhe Moskës, duke përfshirë edhe furnizimin e Ukrainës me armë nëse situata përshkallëzohej. "Ne do të konsideronim furnizimin me armë të Ukrainës, për qëllime mbrojtëse, dhe nëse situata përshkallëzohet akoma më tej nuk përjashtojmë edhe masa më radikale", tha presidenca. Seuli, i cili është shfaqur si një prodhues kryesor i armëve, ka qenë nën presion nga disa vende perëndimore dhe nga Kievi për t'i siguruar Ukrainës armë, por deri më tani është fokusuar në ndihmën jo-vdekjeprurëse duke përfshirë pajisjet e çminimit. Zyra e Presidentit Yoon kishte thënë se do të rishikonte mundësinë e dërgimit të armëve në Ukrainë pasi Koreja e Veriut dhe Rusia nënshkruan një traktat të ndërsjelltë të mbrojtjes në qershor.