Inxhinierë ushtarakë të Koresë së Veriut janë vendosur në vijën e frontit në Ukrainë, për të ndihmuar Rusinë që të godasë vendin nën pushtim me raketa balistike ndërkohë që zyrtarë të lartë në Kiev dhe Seul thonë se ka raporte për disa të vrarë në luftime. Ka dhjetëra koreanoveriorë pas linjave ruse, në ekipe që “mbështesin sistemet e lëshimit të raketave KN-23”, tha një burim në Ukrainë për The Guardian. Kim Jong-un, udhëheqësi i Koresë së Veriut, vitin e kaluar udhëtoi në Rusi për një takim me Vladimir Putinin, dhe të dy ata forcuan lidhjet me një marrëveshje sekrete armësh. Dërgesat e municioneve të Phenianit ishin jetike për t'i lejuar forcat ruse që të përparonin në një luftë shkatërrimtare në Ukrainën lindore këtë verë. Por duket gjithnjë e më qartë, se marrëveshja ka shkuar përtej furnizimit me materiale. Koreanoveriorët ishin mes viktimave pas një sulmi ukrainas me raketa në territorin e pushtuar nga Rusia pranë Donetskut, javën e kaluar, thanë zyrtarët koreanojugorë dhe ukrainas. Nuk ishte e qartë nëse ata ishin inxhinierë ushtarakë apo luftonin në front. Të huajt kanë luftuar si mercenarë për Rusinë, por nëse koreano-veriorët janë në terren, kjo do të ishte hera e parë që një qeveri e huaj dërgon trupa me uniforma për të mbështetur luftën e Moskës.