Trupat e Koresë së Veriut janë tërhequr nga të paktën një pjesë e vijës së frontit në rajonin e Kurskut, në Rusi, sipas ushtrisë së Ukrainës. Një komandant i forcave speciale ukrainase tha për Sky Neës se ushtarët e liderit të Koresë së Veriut Kim Jong Un, që luftonin për llogari të Moskës, ishin tërhequr përkohësisht nga vija e frontit në Kursk, pasi regjistruan humbje të rënda. Mediat ukrainase ndërkohë, cituan një zëdhënës të Forcave operacionale speciale të Ukrainës, që konfirmonte se ushtarët e Kim Jong Unit janë tërhequr vetëm nga një pjesë e vijës së frontit të kurskut. Koreja e Veriut ka furnizuar Rusinë me artileri dhe armë të tjera konvencionale, dhe sipas raporteve të inteligjencës amerikane, Koresë së Jugut dhe Ukrainës, ajo dërgoi 10 deri në 12,000 trupa në Rusi në tetor të vitit të kaluar. Zyrtarët në Seul, Uashington dhe kryeqytete të tjera janë të shqetësuar se Moska mund të reagojë duke i ofruar Phenianit teknologji të avancuar të armëve që mund të rrisë më tej aftësitë e bërthamore të Koresë së veriut. Rreth 1000 trupa të Koresë së Veriut janë vrarë në rajonin e Kurskut deri më tani, sipas një raporti të fundit nga BBC që citon zyrtarë perëndimorë të paidentifikuar. Të premten, ushtria e Koresë së Jugut raportoi se dyshon se Koreja e Veriut po përgatitet të dërgojë më shumë trupa për të luftuar në Rusi.