Ukraina tha të hënën se njësitë e Koresë së Veriut që luftonin për Rusinë humbën të paktën 30 ushtarë përreth disa fshatrave në vijën e frontit, në rajonin e Kurskut në Rusi, gjatë fundjavës. Agjencia e zbulimit ushtarak të Ukrainës io raportoi humbjet në një deklaratë pasi Presidenti Volodymyr Zelenskiy tha të shtunën se Rusia po përdor trupat e Koresë së Veriut në numër të konsiderueshëm për herë të parë, për të kryer sulme në Kursk, një rajon rus ku Ukraina nisi një inkursion ndërkufitar në gusht të këtij viti. Deklarata është hera e parë që Ukraina raporton humbje të Koresë së Veriut të kësaj shkalle dhe në disa detaje. Ai tha se humbjet u regjistruan në afërsi të fshatrave Plekhovo, Vorozhba dhe Martynovka në rajonin e Kurskut. Rusia as nuk e ka konfirmuar dhe as mohuar praninë e koreanoveriorëve në anën e saj. Peniani fillimisht hodhi poshtë raportimet për vendosjen e trupave si "lajme të rreme", por një zyrtar i Koresë së Veriut ka thënë se çdo dislokim i tillë do të ishte i ligjshëm. “Për shkak të humbjeve, grupet e sulmit janë duke u rifurnizuar me personel të ri, veçanërisht nga brigada e 94-të e veçantë e ushtrisë së Koresë së Veriut, për të vazhduar operacionet luftarake aktive në rajonin e Kurskut”, shkruan agjencia ukrainase, pa dhënë prova. Kievi fillimisht tha se forcat e Koresë së Veriut u shfaqën në rajonin e Kurskut, në Rusi, në tetor, dhe më vonë raportuan luftime dhe viktima të paspecifikuara. Kievi vlerëson se janë 11,000 koreano-veriorë në total në Kursk, duke iu shtuar dhjetëra e mijëra trupave ruse. Ukraina, gati një e pesta e së cilës kontrollohet nga forcat e Moskës, ka krijuar një enklavë në rajonin e Kurskut, ku trupat e saj po luftojnë për të mbajtur kontrollin në mënyrë që territori të mund të përdoret si levë në negociatat e mundshme të paqes.