Konvertimi i patentave të shoferëve të lëshuar nga institucionet ilegale serbe në patenta të shoferëve zyrtar të Republikës së Kosovës është zgjatur deri më 23 gusht. Lajmin e ka bërë të ditur ministri i Punëve të Brendshme, Xhelal Sveçla, sipas të cilit vendimi ëhstë marrë për shkak të kërkesave të qytetarëve nga radhët e komunitetit serb. “Bazuar në kërkesat e shumta të qytetarëve për aplikim të pajisjes me patentshoferë të Republikës së Kosovës, ku vetëm dje kemi pasur 273, si dhe kërkesën për zgjatje të afatit për aplikim i cili sipas vendimit tonë përfundon nesër, kam marrë në zgjatjen deri me 23 gusht 2024. Pas kësaj date, për të gjithë ata që nuk konvertojnë patentat e shoferëve, do të veprohet sipas legjislacionit përkatës në fuqi”, ka shkruar ministri Xhelal Sveçla në Facebook. Sipas ministrit deri më tani 5588 qytetarë nga radhët e komunitetit serb kanë aplikuar për konvertimin e patentave, ndërsa shton se ky proces i cili është mundësuar në të gjitha qendrat e Agjencisë së Regjistrimit Civil në Republikën e Kosovës ka vijuar pa asnjë incident. Dokumentacioni i nevojshëm përfshin letërnjoftimin e Kosovës, patentën origjinale serbe, certifikatën shëndetësore, dëshminë e pagesës së taksave dhe origjinalin e patentës së shoferit. Më parë ishte planifikuar që ky proces të zgjaste deri më 9 gusht.