Një numër vendesh kanë forcuar masat ndaj koronavirusit ndërsa e ashtuquajtura valë e dytë e infektimeve vazhdon të rritet. Franca shënoi një rekord rastesh të reja të shtunën, me 32427 infektime të reja ndërsa të dielën raportoi 30 mijë. Sidoqoftë, rritja e rasteve të konfirmuara në evropë, vjen edhe si pasojë e rritjes së ndjeshme të numrit të testimeve që po zhvillohen, krahasuar me valën e parë në mars. Nëntë qytete franceze, përfshirë Parisin, janë tashmë në ndalim qarkullimi nga ora 21.00 deri në 6 të mëngjesit për të paktën një muaj. Kushdo që del jashtë në këtë fashë orare duhet të ketë një arsye madhore ose mund të gjobitet me 135 euro. Nga e hëna, të gjitha baret dhe restorantet në Belgjikë janë mbyllur për katër javë dhe do të ketë edhe një ndalim qarkullimi në fuqi nga mesnata deri në 5 të mëngjesit, me shitjen e alkoolit të ndaluar pas orës 20.00. Zvicra ndërkohë të dielën reagoi ndaj rritjes së ndjeshme të rasteve duke e bërë maskën të detyrueshme në hapsira publike, masë kjo që ka hyrë në fuqi nga dita e sotme. Tubimet e më shumë se 15 personave në publik janë ndaluar po ashtu. Republika ceke po shqyrton mundësinë e një izolimi tjetër ndërsa Irlanda do të njoftojë masa më të rrepta gjatë ditës. Gjermania shënoi një rekord të ri ditor infektimesh të shtunën dhe kancelarja angela merkel i kërkoi njerëzve të qëndrojnë në shtëpi dhe të evitojnë udhëtimet. Pasi OBSH raportoi një rritje shumë shqetësuese prej 44 për qindësh të rasteve në evropë, në një javë, polonia shënoi një tjetër rekord të dielën.