Deputetët e Partisë Demokratike të Kosovës dhe Aleancës kanë vazhduar për të katërtën javë radhazi aksionin para godinës së Qeverisë së Kosovës, duke bllokuar hyrjen në ndërtesë dhe duke kërkuar zhbllokimin e konstituimit të institucioneve. Aksioni nisi që në orën 07:30 minuta të mëngjesit, ndërkohë Lidhja Demokratike e Kosovës nuk mori pjesë në protestë. PDK dhe Aleanca i kërkojnë kryeministrit në detyrë, Albin Kurti, të ndërmarrë hapa për zhbllokimin e procesit të konstituimit të Kuvendit dhe formimin e institucioneve të reja. Kriza politike është krijuar që prej 8 gushtit, kur u ndërpre seanca konstituive e Kuvendit. E ndërkohë marrëveshja mes Vetëvendosjes dhe LDK-së për të mbështetur kandidaturën e Bekim Sejdiut për president ka hasur në kundërshtime brenda vetë Grupit Parlamentar të LDK-së. Nëse nuk arrihet një konsensus politik, Kosova rrezikon të rikthehet në zgjedhje.