Forcat detare izraelite kanë ndaluar dhe konfiskuar të hënën një anije bamirësie, e cila po përpiqej të thyente bllokadën detare në Gazën e shkatërruar nga lufta. Anija me ekuipazh prej 12 personash, përfshirë aktivisten Greta Thunberg, tani është duke u dërguar në një port në Izrael. Jahti me flamur britanik, Madleen, i operuar nga Koalicioni i Flotës së Lirisë propalestineze, synonte të dërgonte një sasi simbolike ndihmash në Gaza të hënën pasdite dhe të rriste ndërgjegjësimin ndërkombëtar për krizën humanitare në territorin palestinez. Megjithatë, anija u kap gjatë natës para se të arrinte në breg. Ministria e Jashtme izraelite konfirmoi më pas se Izraeli e ka marrë nën kontroll anijen. “‘Jahti i selfieve’ të ‘të famshmëve’ po shkon i sigurt drejt brigjeve të Izraelit. Pritet që pasagjerët të kthehen në vendet e tyre të origjinës”, shkroi Ministria izraelite në X. Të gjithë udhëtarët janë të sigurt dhe të padëmtuar, shtoi më vonë Ministria. “U janë dhënë sanduiçë dhe ujë. Spektakli mbaroi”, shtoi ajo. Pjesë e ekuipazhit prej 12 vetash ishin edhe aktivistja suedeze për klimën, Greta Thunberg dhe Rima Hassan, anëtare franceze e Parlamentit Evropian. Një fotografi shfaq ekuipazhin të ulur në anije, të gjithë me jelekë shpëtimi dhe me duart lart. Aktivistët raportohet se janë shtrënguar të shohin imazhet e sulmit të Hamasit në izrael, në tetor 2023.