Presidenti iranian Ebrahim Raisi u konfirmua i vdekur pasi ekipet e shpëtimit gjetën të rrëzuar dhe të shkrumbuar nga flakët helikopterin që transportonte atë dhe zyrtarë të tjerë në një zonë malore mes Azerbajxhanit dhe Iranit pasditen e së dielës. 63 vjeçari Raisi, Ministri i Jashtëm Hossein Amir Abdollahian; Guvernatori i provincës së Azerbajxhanit Lindor Malek Rahmati, Imami Mohammad Ali Alehashem, një pilot, ndihmësi i tij, shefi i ekuipazhit, shefi i sigurisë dhe një truproje tjetër, u konfirmuan të gjithë të vdekur nga mediat iraniane, vetëm disa minuta pasi ekipet e shpëtimit, të udhëhequra nga Gjysmëhëna e Kuqe mbërritën në vendngjarje. Më pas, lajmi për vdekjen e Raisit u konfirmua edhe nga televizioni shtetëror iranian, i cili e cilësoi presidentin si "martir të shërbimit" duke specifikuar se vendi dhe data e ceremonisë mortore do të komunikohet më vonë. Trupat e presidentit iranian dhe viktimave të tjera u transferuan në Tabriz në veriperëndim të Iranit, pranë vendit të rrëzimit të helikopterit. Lideri iranian dhe zyrtarët e tjerë po ktheheshin nga një vizitë zyrtare në Azerbajxhan, ku përuruan një digë të re në Aras, kur helikopteri amerikan Bell 212 u rrëzua për motive ende të paqarta në një zonë kufitare mes dy vendeve, në anën azere. Paraprakisht, nga raportimet mendohet se mjeti fluturues mund të jetë rrëzuar për shkak të motit të keq dhe mjegullës së dendur, teksa nuk përjashtohet dhe mundësia e një avarie. Menjëherë, pas humbjes së kontakteve me helikopterin presidencial, qindra ushtarë iranianë, të ndihmuar dhe nga pala azere nisën një operacion kërkim shpëtimi, ndonëse në kushte shumë të vështira atmosferike dhe natës që po binte. Nuk mungoi ndihma as nga Rusia, e cila angazhoi 50 persona.