Shkelje dhe abuzime janë konstatuar nga Kontrolli i Lartë i Shtetit në shërbimin e hemodializës, i cili është dhënë me koncesion nga shteti për trajtimin e pacientëve me sëmundje renale në Shkodër, Vlorë, Lezhë, Elbasan dhe Korçë. Kompania konçesionare Dia Vita, në pronësi të Klodian Allajbeut, biznesmeni që zotëron edhe Spitalin Amerikan, ka marrë pagesa nga shteti edhe kur nuk ka ofruar shërbime dialize, sipas raportit të auditit të Kontrollit të Lartë të Shtetit, në pesë qëndrat ku ofrohej shërbimi i dializës. Një rast, i cili citohet në raport, është ai i një qytetari që kryente seancat e dializës në qëndrën e Lezhës, por që për shkak të ndryshimit të vendbanimit ju desh që këtë shërbim ta merrte në një spital jo publik, i cili ka kontratë me Fondin e Detyrueshëm të Kujdesit Shëndetësor dhe paguhet për këtë. Por, në të njëjtën kohë, Fondi ka paguar edhe qëndrën konçesionare të Lezhës, ku qytetari kryente më herët seancat. Auditi zbulon se raportimet e konçesionarit për shërbimin e hemodializës, kryeheshin në bazë të projektimeve dhe jo të seancave faktike, duke bërë që pagesat të ishin abuzibe dhe për mos përkonin me shërbimin e ofruar. KLSH raporton se qendrat e dializës së koncesionarit nuk janë monitoruar as për kostot dhe as për cilësinë e shërbimit që kanë ofruar. Dhe kur kanë mbetur edhe pak muaj nga përfundimi i këtij koncesioni nuk ka një raport mbi kosto eficensën e tij.