Teksa ndodhet në një vizitë në Kanada, kryetari i Bashkisë së Tiranës, Erion Veliaj është takuar edhe me kryeministrin e Ontarios, Doug Ford, me të cilin bisedoi për suksesin e komunitetit shqiptar atje. Veliaj falenderoi kryeministrin për mikpritjen që i është bërë komunitetit shqiptar, të cilët e kanë nisur nga zero dhe janë shkolluar, kanë krijuar familjet e tyre dhe janë kthyer në histori suksesi. “Sot ky komunitet është një urë e jashtëzakonshme për të bërë biznes, për të punuar në institucionet akademike, është një kompliment për punën tuaj, për ta mbajtur Ontarion dhe Toronton një hapësirë të hapur për emigrantë të rinj, që nesër bëhen ndoshta ambasadorët më të mirë të dy vendeve tona. Jam shumë mirënjohës, dhe mezi ju pres të vini një ditë në Tiranë, ku kryeministri ynë ka bërë ndryshime dhe reforma të jashtëzakonshme”.