Shtetet e Bashkuara të Amerikës kanë paralajmëruar kreun e Republika Srpska në Bosnjë, Milorad Dodik, që sipas tyre ka bërë që komunat serbe në këtë shtet të dalin nga programet e ndihmave të SHBA. Sipas ambasadës së SHBA-së në Bosnje, kreu i Republika Srpska, entitetit serb të Bosnjes, Milorad Dodik është më i shqetësuar për pasurimin e tij se sa për pasurimin e komunave në RS. Duke theksuar se SHBA-ja mbështet fuqimisht vetëqeverisjen lokale në Bosnje dhe Hercegovinë, Ambasada në një postim në rrjetin social X theksoi se shumë komuna në të cilat Aleanca e Social Demokratëve të Pavarur (SNSD), kryetar i së cilës është Dodik janë në pushtet, u tërhoq nga programi amerikan i ndihmës, sepse Dodik u bëri presion për t’u tërhequr. “Komunitetet e tyre tani po humbasin përfitimet – punë, infrastrukturë të përmirësuar, investime dhe më shumë – që ofrojnë këto programe. “Dodik merret më shumë me pasurimin e vetes dhe të familjes se sa për të pasuruar komunitetet lokale dhe për të përmirësuar cilësinë e jetës në komuna”, thuhet në njoftim. Reagimi i përfaqësisë së SHBA përfundoi me deklaratën – “Ne e dimë se ku janë paratë”.