Kur Donald Trump hyri në Shtëpinë e Bardhë të gjithë në Bruksel ishin të përgatitur për një përplasje me aleatin e madh përtej Atlantikut, por askush nuk e priste që përmasat e kësaj përplasjeje të arrinin kulmin që në muajin e parë të Presidencës së tij. Trump po kërcënon Europën me tarifa, po e përjashton nga bisedimet e paqes në konfliktin më të madh që nga Lufta e Dytë Botërore, që po ndodh në oborrin e Bashkimit Europian, kërkon më shumë financim për NATO-n dhe kërcënon me tërheqjen e trupave amerikane nga kontinenti i vjetër. Nuk është sekret që Donald Trump nuk e dëshiron Europën e bashkuar. Mandatin e tij të parë, nga 2016-2020, ai mbështeti Brexit dhe në disa deklarata sugjeroi se Bashkimi Europian duhej shpërbërë. Ai shantazhoi aleatët e NATO-s që të rrisnin shpenzimet për mbrojtjen në 2 për qind të Prodhimit të Brendshëm Bruto dhe tani, që pjesa dërrmuese e aleatëve europianë e kanë arritur këtë objektiv, kërkesa e Trump u rrit në 5 për qind.