Pavarësisht protestave dhe kundërshtisë së qytetarëve që preken nga harta e re administrative – territoriale, socialistët pritet të avancojnë me reformën dhe ta miratojnë atë në fillim të muajit tetor. Në konferencën e kryetarëve, nuk pati dakordësi mes pozitës dhe opozitës për kalendarin e punës për këtë reformë, por datat e shqyrtimit dhe miratimit të saj pritet të aprovohen me shumicë votash në seancën e së enjtes. Balla: “Sa i përket procedurës që do të ndjekë Kuvendi, gjërat që disponon këshilli bashkiak po shkojnë drejt fundit. Përfitoj nga rasti të bëj një komunikim publik: të gjitha bashkitë që nuk e kanë kthyer ende përgjigjen kanë edhe pak kohë, deri më datë 29, në mos gaboj. Pa asnjë dyshim, Kuvendi nuk do të votojë përpara datës 29. Nuk mund ta shkelë këtë afat, sepse është një afat ligjor. Pas datës 29, një nga të enjtat e parashikuara në program, në mos gaboj më 8 tetor, shpresoj shumë që Komisioni i Çështjeve Ligjore, që është komisioni ku do të mblidhen të gjitha argumentet, së bashku me punën shumë të mirë të bërë nga Komisioni i Posaçëm, të na çojë drejt votimit brenda atij afati që thashë.” Sipas Ballës, kjo nuk do të jetë hera e fundit që preket harta administrative territoriale, ndryshime priten edhe përpara përfundimit të këtij mandati të parlamentit. Balla: “Kjo nuk është reforma më e thellë që mund të bëjmë. Është e pjesshme dhe besoj që vitet që do të pasojnë do të sjellin edhe reforma të tjera, ndoshta edhe përpara përfundimit të këtij mandati të këtij Parlamenti. Kalimi nga 61 në 46 është një hap. Dhe ajo që e themi shpesh dhe që do të jetë kryefjala është se përfituesit e kësaj reforme do të jenë qytetarët, të cilët do të marrin shërbime edhe më të mira.” Demokratët ngrenë shqetësimin se rregullat dhe kufijtë brenda të cilëve zhvillohet gara elektorale nuk duhet të përcaktohen në mënyrë të njëanshme, ndaj harta nuk duhet të shkojë përpara pa konsensus.